المومس القعيدة

المومس القعيدة — وقفت لحظة نتـأمل أيام وسنين

فوجه عجوزة قـاربت السبعين — فركنة مظلامـة تبعث أنـيـن

تناجي ربنـا وتقول يـا لحنـين — انا اللـي زغت وتلفت فالزحـمة

انـا اللـي جرت وطغيت بالكلمة — انـا اللـي صلت بحـال النجمـة

انـا اللـي غلطت شوف بعين الرحمة — ربـي فـين لخوت والـوالـدين

مشى المـال والجـاه مشى الزيـن — مشى القـد و السالف و العـينين

ما بقـا غيرك يـا لكريم لـحنين — كنت فـداري فـعـزي وشـانـي

نـلـفها بحـبي وعطفـي وحنانـي — ما مشيت لحد ولا حد عمـرو جانـي

حتى ليوم فـلحمام شيطـان غـوانـي — لقيت عكوزة قلت نبـرها بحال امي

شكات لي همـها وشكيت لها همـي — بعد تحاكينا قالت لـي بنتي تخـدمـي

قلت لها أنـا فعزي وشاني ايـلا تفهمي — قالت شوف خدمتي وداك الساعة حكمي

فـليـوم الاول عرضتـني لقـصارة — حديث شهـوة وكيسان اتـاي دوارة

و توالات لعرضات فـرحـة وبشـارة — وانـا مـا على بـالـي لعكوزة مكارة

سقـاتـنـي لخـمر بلباقـة وشطـارة — ولـعبت لعـبتـهـا اللـفعـة الغدارة

لـقيت راسـي فارقـة داري واولادي — و ضحيت حديث الماجي وحديث الغادي

نكروني حبابـي ونـاسي نـكران ابدي — ولـي شافنـي ينعتنـي ويقول هيا هذي

تـقـاضى مـا كان عندي مـن مـال — ولـيـت نـخمـم فـحـالي و الـمآل

لا قـرايـا قـريـت ولا كـسب حـلال — و بقـا كـل راس مالـي الـذات والجمال

بـديـت نـدور مـن دار لـد ار — ولا فـمـي نـعـام وخـيـار

نـساعـف ونصبـر ونتجـرع لمرار — بنت الليـل بالليـل وخـدامـة بنهار

غـلبت بزينـي جـميع بـنات الليـل — وتـزايـدو عليـا لـي بـحالي فالويل

كروش لحرام تقلونـي بالمـال الثـقيـل — حتـى ليـوم لقانـي راجـل جـليـل

ذكرنـي بـايـام كنت نسيتهـا من بالي — بـوالـديـا وخوتـي وراجلـي وعيالي

بكيت وبكيت ولحـت عللـه حـمـالي — وتـبت وجـعـلت فـالله كـل امـلي

عـشت فـدار الـشيخ سنـيـن وسنيـن — وتـلـيت وراه نـمـد للنـاس الـيديـن

مـا شـبعـت كـرشي على فـين وفـين — وجـلـدي لـي كـان حـرير فـلـيـن

قـساح وتـجـدج بلبرد والشقا والتصـبين — ومشـات ليـام ولعمـر طـوال فـلعـذاب

و كثر المرض و مشى الجـهـد والـدراع داب — خـلاص التـوبـة و ما داروه فـيـا الـدياب

هذا مـا جناتـو يدي و مـا كان عليا مكتـاب