هلّ الهلال

هلّ الهلال وهلّت العين بدموع — هلّ وتحدّر من على الجفن منيّ

هلهل هماليل ٍعلى الخد برجوع — هلّت وفيها مرهق المزن حنيّ

حالي طواها امهايم اهموم بإ سبوع — ما آكل ولا أشرب من دهايا ًدهنيّ

غديت بهلول ٍ ،، من العقل مفجوع — كلّش يورّى لي ،، بكثر التمنيّ

وأشوف دايه دن ًبخمسة عشر نوع — ضيم الدهر كله مع اخلاف ظنيّ

وافراق حيين المصافات مرجوع — لو كدرن عام ٍ فهن يرجعنيّ

والبعد عنهم يقصر الشبر والبوع — وأيام خلاّن الرخاء ينقصنيّ

والرُجل ماخِبر بفمه يلمس الكوع — ولاخِبرت نجوم الضحى يظهرنيّ

والطير لابده ولو طار بوقوع — والعجل ما يقضي لزومه يثنيّ

والماء الزلالي ما يوافق على الجوع — والنفس زينّها بكثر التونيّ

كثر التمني ،، ما يجي منه منفوع — إلاّ الشقاء ومسرّحات الهبنيّ

لولا الحيا انّي لأترك الثوب مجدوع — وأمشي كما مجنون ليلى وأغنيّ

على الذي حبه بقلبي له اصدوع — مثل الصدوع اللي لها جرد شنيّ

راعي ثليل ٍ فوق الأمتان منسوع — لين الردوف أطرافهن يضربنيّ

والخد كنه من سنا البرق منشوع — يكشف حناديس الظلام المكنيّ

دق الوشيم ابها دواوير مردوع — وضّح ثنايا ،، مبيسمه يلعجنيّ

والعنق عنق غزّيل ٍ حس بفزوع — سمع الرمات وراح كنه يسنيّ

ونهدين مثل التين بالرّي مصنوع — في لبة ٍ له توهن يظهرنيّ

وثلاث له ،، من البريسم بجالوع — فوق البريم وحدرهن مايمنيّ

وسطه دقاق وردفه الغض مرفوع — رفعة سنام حوير ٍ شكلهنيّ

وفخذين للفهمين درّاج مزروع — موز ٍ على شرواه ما يوجدنيّ

وعمره على ماشوف مقبول مربوع — لاوافيٍ ٍ أصلي ولاهوبدنيّ

غرياف موز ٍ في ظلال ٍعلى فوع — تشوف نسناس الهوى به يثنيّ

يسبى القلوب الراسّية كره ٍ أو طوع — له روس طرّاد الهوى يخضعنيّ

كنّه من الجنّة على الأرض موقوع — حوري من الحور الذي يذكرنيّ

لولا الحيا وأدرى يقولون زعزوع — سلّمت له حالي ومالي وفنيّ

وأمشي مع اللي لي يعذلون مشروع — مرضات من ظنّه على لون ظنيّ

أهل المكر والحسد ،، ماعنهم قبوع — لين إنها تصفى ،، على غير منيّ

من لامني يآكل عياله من الجوع — وايغيّر الله زوله ،، بزول جنيّ

وأنا وحق اللي بالأوراق مطبوع — ما أنسى وليفي لو، ورى الشطّ عنيّ