زمـل التخـوت

الشعر يعكس ما خلج داخل الذات — ويبقى على طول الزمن له وقارة

والجزل يبدع جزل ضمن الجزيلات — ولا اختلف عبر الليالي مسارة

والله يجمّلني مع أهل المروّات — ما دام جزل الشعر شبّيت نارة

والدعوة اللي من عريب السلالات — لبّيتها من باب عرف ونعارة

دعوة وفي لأجله تهون المسافات — عادل ولد مطلق حكيم العبارة

مثل الجبال الراسيات الطويلات — هذا وهو من دون ربعه ودارة

واليوم هذا غير عن كل ما فات — يوم اجتماع أهل السعد والسطارة

سلام يا أهل الطيب وأهل البطولات — اعداد من خص الحرم في زيارة

كل عام وانتم بالهنا والمسرّات — وكل عام وانتم حايزين الصدارة

قل خالدي يفتح لك المجد صفحات — والعز والنوماس دايم شعارة

قومٍ لهم من ماضي الوقت وقفات — يوم الرمك بالماد ثوّر غبارة

زمل التخوت مروّضين الصعيبات — حمّاية التالي بعد كل غارة

من هو يخاويهم حياته سهالات — ومن هو يعاديهم يذوق المرارة

لهم سنام الفعل في كل الأوقات — ومشوا على درب الخطر في جسارة

أهل وفا وأهل كرم وأهل فزعات — ومن عاشر الويلان ينسى ديارة

ويشهد لهم حسن الجوار السجلّات — والخالدي معفي عن عيال جارة

وأفعالهم ما تنحصر عبر الابيات — لو كان جزل الشعر لي باقتدارة

وربعي جهينة مثل ذيك السروات — ويشهد لهم عصر الرسول وخيارة

وأمجادهم ما هي بحاجة لإيضاحات — والكل يعرفها بسر وجهارة

من غير قاصر في رجال الثقيلات — اللي لهم في كل حُقبة حضارة

وإن كان مالك خالدي بالصعيبات — أنا اشهد إنّك عايشٍ في خسارة