مديت كفي وكفيت مدي

مديــــت كـفــي والشـــعــر مــد كفه — كـــف الجـــزاله والعطـــا والقــــواميس

وْكفيــت مـدي وايضــا الشــعر كفه — ان كـــان شعـــري ماهو للجيــل تدريس

وان كان ما يطــرب به الصم حرفه — وان كـــان ما غنــى بــه البكـــم ترويس

خاويت لي شـاعر من الجن وصفه — نمرود واذكى من العفـــــــاريت وابليس

واقوى من اللــي للنبـي قبـل طرفه — يرتـد لـه حضـر لـهــم عــرش بـلـقـيـس

مقــدام واللي دونها يشـــوف حتفه — عيّد بها وعـلــق عليـــــها الفــوانيـــس

واللي يْعصى له يخــزمه رغـم أنفه — مْن القـــاف والا من الملـــوك الأطاليس

جني عزيـــز النفس مســـلم مـا لفه — شيطــــان ولا مسـه من ابليـــس تلبيس

ان جا يجي مشتــــاق سرعه وخفه — وان روّح يشيـــــل الهمــــوم المتاعيس

تمشــي ملــوك الإنس والجـن خلفه — بالغـطــرسه مـا هـي وراثــه وتــاسيس

إما التقـيـــنا في جـبـــل فـــوق طفه — نطوي صخور الشعـــر طوي القراطيس

والا التقـيـــنا في بحـر وســط نطفه — نجمـــع لآلــي الشــعر فيـهـــا غواطيس

نطرق فنـون الشعر قافه وصنفه — حتـى وصـلنـا للهــــوى والمـجـــــاليس

يا شــــاعري للحب في الشعر وقفه — وقّف وصــوّر لي رهيــــف الأحــاسيس

ليل ارتخــى من هـــامته تحت كتفه — خلف النهـــــار اللي صـــفا بالتضاريس

وْفصل الربيـــع اللي لي الوقت زفه — خصٍ ليـــا لاحــت بــروق الغطـــاليــس

وْخصٍ ليا سل السيـــــوف المصفه — وطــــاحت ليــا ثــارت رماح النواعيس

منه النهــــار يفـز لي حيــن يْخطفه — ليـــلٍ جـفــل والا حكـــت له نســـــانيس

والا انطـــوى الليـــل ونهـاره يلفه — اليـــا لعب لي والخـــــلايق منـــــاعيس

اعشق نهـــاره لو يجي يثني عطفه — شمــسه براد وما هي مثــل الشـــواميس

وليـــله عشـقني والقـمر تـم خسـفه — ماحلى ظـــــلامه ليـــل هـد العســاعيس

يا من ملكــت القــلب نسـمع ونسفه — عذال وانتـــه لا تجيـــــــــك الهـواجيس

العشق عندي كـــــــــان ودك تْعرفه — اقرب وشـــــوف النار بين المقـــاويس

واجلس تدف وحبــك بيــــــــدك دفه — وسط اللهب كان العشق من طرف قيس

العشق ياهل العشق ما يعطى نصفه — واللي عطى نصفه حيــــــــــاته مفاليس

ياعشق من وفــــــــاك بالعشق وفه — واللي بخـــل به عنـــك لاتقيس له قيس

يا شـــــاعري ماينقص اليـــوم وفه — فالمقبــــــلات ان كــان باقي مقــــابيس