الشُهرة

على الله رزق ابن آدم محد بيموت من جوعه — وأنا شاعر على الدنيا..ترفّع عـن مواطيهـا

يصلّي الفرض والسنّه وتدمع عيـن لخشوعـه — مهما شاف من دنياه مـا يخضـع ويشكيهـا

يصوغ ابيات تلو ابيات من بحـره وينبوعـه — تردّدهـا كثيـر اصـوات تلحّنهـا وتغنيهـا

ألا يا بدر والشهره لكـل الخلـق مشروعـه — وأشوف اسخف نواياكم بدت تظهـر خوافيهـا

يدين الـلاش مـا تنمدّ .. مبتـوره ومقطوعـه — حرمها الله فزعتهـا ووقانـا مـن مساويهـا

اذا لي شهره ولي صيت تصير الصبح مذيوعه — تقدّمها انت لا عـادت ولا عـادت مواريهـا

من قبلي لقيت ان القصايـد فيـك مخدوعـه — صداقه حفنـةٍ لتـراب ظنّـي مـا تساويهـا

اذا شيمة رفيق الـدرب وا عـزّاه منزوعـه — وقاني خالقي بأتفـه مواقـف ينعـرف فيهـا

أنا لي عزوه وجمهور يعَزف الـود مقطوعـه — قصيدة هاجسـي تطـرب مسامعهـم قوافيهـا

وأنا اقلامي عن اسفاه العرب يا بدر مرفوعـه — تصادفني كثيـر اصنـاف اطنّشهـا واجلّيهـا

وخـدّ الغـدر أبتقدّم .. وأبتوازن .. وأبآصوعـه — واقلّه رح بلا صحبه يا عمّـي روح سرّيهـا

تبختر يا قصيدي حيل بأسوّي منك موسوعـه — يشبّ النار يـا عينـي يـدوّر مـن يطفّيهـا

تشبّث يا قصيدي زيد واحرق سالف طبوعـه — مواقفنـا رجوليّه .. تثبـت صـدق اهاليـهـا

ومن يقدِم على خطوه .. تعيبـه نيّـة رجوعـه — وهبوبي هبّت وينسف سفيـه القـوم سافيهـا