الغرب الحرام

اضغط على أي بيت لعرض معانيه وشرحه

من امتى كان موت الضمير شئ مريح...وعمى القلوب افضل كتير م فكرة التفيح...

خليك صريح واعترف سيبك من التلميح...بالانبطاح والفكر البديل...

ارسم خليجك الغربي على سُنة التطبيل....قول انك تعبت م الكدب و التمثيل...

وسلم المفاتيح...حصانك العربي أصبح كسيح...

والسيف بقى وزنه تقيل قوي...وحتى شكله مابقاش مريح...

اخلع هدومك كلها على الاعتاب...الكل زيك عريانين...

ماتخافش م اللوم والعتاب...ما بقاش بقيلك من غترتك غير رسمها....

ومن ملتك غير اسمها....و لسان فصيح....

انصب منابر عجزك فى الصحن الفسيح ...وابدء خطابك بالثناء وبالغنا والمديح....

وولي وشك ناحية الغرب الحرام....وادن فى شعبك يحج له بالمحبه والسلام....

وتوب إليه بالصلاة والدعا والحمد و التسبيح...اصرخ وقول إن الزمان غير الزمان....

إن المكان غير المكان....قول كل وقت وله أدان...

غير خريطة العدو بخريطة الاحباب...وفند الأسباب....

افتح طريق للصهينه والهيمنه..افتح لها كل يوم ميت الف باب....

او لا تفند ما دمت للاسياد مطيع...مادمت سامي.. ومادمت كالحمل الوديع...

مادمت ماشي بالمعتدال مرش السريع...مادمت سابق للجميع...

مادمت شايل فوق كتافك راية التطبيع...العن كل حركات الشعوب...

اتجوز المرأة اللعوب...غير ملامح غترتك واصنع چاكته بالجيوب...

واشحن رصيدك بالشيكل والنفط والدولارات....ضميرك العربي أصبح رفات....

وحصانك العربي اللى مات ...بدلوه هيكل صفيح....

والصحن مليان بالجنود...والاقصى حالف بدينه وملته ....

لايمكن على ايدك يعود...مستحيل هيملك امره لللى مش مالك لقمته...

اكرمله يفضل بعلته ...و حجته...

الضعف اللي مالك أمته...وإن اللي غير قبلته..

باع القضيه وزمته وهويته...يعنى ماقدرش يحفظ غترته...

لما هب الريح...ازاي هيحفظ كلمته....

ويرجع القدس الجريح...

عن القصيدة

«الغرب الحرام» من شعر أبي حجاج، وتقع في ٢٧ بيتًا. وهي بالعامية، ورويّها حرف الحاء.

التعليقات(٠)

سجّل الدخول لإضافة تعليق.