مذكرات عبيط *الجزء الأول*

آه منك آه يا بلادي — يوم فيكي الخير بينادي

و سنين الشر يعادي — آه منك آه يا بلادي

آه منك آه وقوليلي — ليه فيكي احتار دليلي

ليه فيكي أزرع أحلامي — بإديكي تهدي تشيلي

ليه فيكي العيشة بتغلى — مش عارف أعيش و الاغيها

و الخير ما بيطمر فيها — ولا راتب بيكفيها

لا في يوم مصلحة بقضيها — ولا غنوة اتمتع بيها

آه منك آه ولدتني — أمي من يجي ثلاثين

وأنا فاكر يومها قليتلو — بكره كدا ع الستين

هيحقق أملي و يكبر — و نعيش متستتين

لكن ولا هي عاشت — و أهو مات الحلم جنين

وانا كنت في الابتدائية — فاكر العيشه هنية

لانا حاسس ايه راح يجرى — والدنيا ايه مخبية

ودخلت الاعدادية — و عرفت أعمل جمعيه

و جبت كتب خارجيه — و ذاكرت شوية شوية

و دخلت الثانوية — ولاعمري شفت مدرس

يشرح ولا حتى وليه — كله بيقول تعللنا

دا ملكش إلا الخصوصية — وطلبت دروس خصوصية

وطلبت كتب خارجية — قال أبويا دروسك يابني

مش هتكفيها مهية — راح ابويا و باع دهب امي

و شحتلي فلوس من عمي — شيلني و شال من همي

آه منك آه يا بلادي — و دخلت خلاص كلية

فكرت الهم نسيني — فكرت خلاص هلاقيني

أسعد انسان في الدنيا — لكن كورسات و دكاترة

وطلعت أنا الي عبيط — و أهو راح أبويا عشنها

و رهن لها عفش البيت — أنا قلت لابويا حرام

و كفاية بقى أوهام — قالي أمك ماتت تحلم

تلقاك دكتور أورام — و ذاكرت سهرت ليالي

و انا تايه مش على بالي — الدنيا ايه مخبيه

ولا فين هيكون مئألي — وبقيت دكتور يا حرام

دكتور ايه ياد دا كلام — بمرتب يابني ما ينفع

يأكل جوز حمام — لا هعرف أرد لعمي

ولا هعرف أراضي أبويا — ولا هعرف يوم أتجوز

ولا هعرف أساعد أخويا — ولا في فلوس أحضر بيها

و علاوة أنا مستنيها — لو هفضل كدا مستني

هيجيبوا عاليها واطيها