حوش فاضى وباب مقفول

أدان الديك خطف روحى — وطار بيها لبيت من طين

زمان وحنا عيال كنّا بيحضنّا فـ نتمدّد — يضلّلنا شجر حنّة

ودكّة عجّزت مـ الهـم — ومسنودة فـ حيط دايخ

, بتطلع عينه مـ الوقفة — ومن لعب العيال جنبه

ودافنه رجلها فى طاميه — عشـان تشفيها مـ التشقيق

ومسنودة بنوم جدى — بيحميها مـ النسيان

وديك واقف على راسها — ينادى عـ النهار يصحى

يصفّر له — نقوم نلعب ونتشاقى

ونملا الدار زعيق وعفار — فيضحك سقف دارنا البوص

ويفتح قلبه طاقة نور فـ عين جدى — يفتَّح عينه يتنحنح

نقوم زي الفيران هاربين — و نتخبى ورا الشجرة

يلبس عمّته ويضحك — ويرسم فوق أيديه عصافير

ينفخ فيها نور قلبه تجيلنا تطير — وتأخدنا على حضنة

نلاقى فيه الأمان و الخير , — صوامع قمح بتدلدق علي الجانبين

نغرف منها وننادى لكل الطير — يفتح قلبه بالحكايات

ويحكى لنا — عن بوابة مقفولة

ومادة إيديها سور عالى — يبيض جوفها بيوت من طين

ونسوان فى الملاية اللف — و متصانة كما الاسرار

وجامعنا فيه فصوص مـ نور — مرصوصة لحد السور

وقت ما كان الزمن طيب — وكانوا الناس بني آدميين

ولا كانشى فى (( في أبوعموري))( ) — قابيل وهابيل

كانت عايشه ورا الخارطه ومرتاحة — يزيد جدى في سرحانة

يفيض النيل فـ عيونه — فأعمل سد من إيدى

وأمنع عنه فيض عينه — وقت ما يدخل المشهد

جنيَّة — تفرد شعرها الأحمر بطول الأرض

فتتقفل البيوت بأبواب — محكومة بـ 100 متراس

وتشاور — لجار جدى فيعشقها

يسرَّح شعره بالمنجل ويتحنجل — يغسل توبه من عرقه

يروح يسكن حدا بيرها — فينزل له هاروت وماروت

يتعلم عشانها السحر — تمد أيديها تخطف روحه جوَّه البير

فيطلعوا في نصاص الليل كما الحيات — يطْفوا الضي مـ القناديل

فتتعبا الشقوق تعابين — تخطف في العيال بالليل

يسكت جدى على غفلة — تضللنا سحابة رعب

نجري بسرعة نتخبي — في شونة تبن

فتملانا حطب مع قش — يفرد تاني حواديته

نعود نجرى لوشُّه الهش — نبني عش مـ الأحلام علي كفه

وكيف ما نحب نبني الدنيا بكفوفنا — أما نعدّى جنب البير

شيطان خوفنا بيغلبنا — ندَّاري ورا منه

وبعد سنين ,,مات الخوف — ومات جدي

,وساب الدار — حوش فاضي وباب مقفول