(( عبــّر ودروس ))

خذينا من اللي قد سبقنا عبر ودروس — رجالً جنينا الفايده من تجاربها

وعرفنا لدروب اللي بها يكسب لناموس — ودخلنا سباق الخيل يمكن نفوز بها

أوردنا على هداج ما نارد صوب الرسوس — ونميز ما بين اللي هماج من عذبها

نحب الجزيل ولا خلقنا ضعاف النفوس — ونعرف الرجال اللي عريبه مناسبها

خلقنا أبزمان(ن) صعب مابين جوع وبوس — وذقنا من الدنيا الدنيه عـقايبها

وعشنا حياة(ن)كل أبوها شقاء وشموس — نقاوم صعـوبة وقتنا ما أنحسبها

نصارع زمان(ن) فيه خضر الغصون يبوس — ودنيا تقلبنا ومــراً نقلبـهـا

وطلعنا أبجيل يمدح الرجل لجل الفلوس — وناسً من أجل المال ضاعت منسبها

لكن حكمة الرب الذي فوقنا قـــدوس — عليم أبخـفي الأسرار واللي يدور بها

خلقنا وفـرق بيننا في طبع وجنوس — وناسً تحصل رزقها في مصايبها

وفينا ثقال النفوس وأيضا خفاف النفوس — النفوس خلقها الله وخلف مراتبها

وفينا خلق رئيس وفينا خلق مريوس — وعطانا عقول لا ومرنا نعرف أبها

وفينا سعيد الحض وأيضا بنا المنحوس — وفينا ضعوفً ضيع المال مذهبها

وناسً تفوز أبرحمته رافعين الروس — نهار المحاسب تفتخر في مكاسبها

وردي النصيب ألمشتقي باللهب مغموس — جـزاه بجهنم تصتليه أبلاهيبها

هذاك ومعه ناسُ لهم فالحياة أطقوس — يقولون نقراء الكف والحض نكتبها

عليهم شياطين الندم تلعــب المنكوس — تغـوي عقولآ فاسدة لين تلعبها

وتغري أضعاف الدين بالمشي والملبوس — وتقلد بعد حتى أكلها هـو مشربها

يجيك الولد في مشيته لا مشاها يهوس — ودربً بها أهل الخير دربه يجنبها

وتاج الكرامة تحت رجله يـــدوسه دوس — أرجالا(ن) تجيب العايبه ماتعايبها

هذا اللي يخلي خافقي بالحشى محموس — ورمشي من أعماله خطيراً يشيبها

أربوعه الذيابه وجلساه الضعيف بسوس — لكن من قرينه بس يتبع ثعالبها

يبي الفرس بس المشكل انه هو المفروس — وعـرف الثعالب ماتدمي مخالبها

لكن بتركه والغيض في داخلي محبوس — وبكتم زعل نفسي ولو كان يعطبها

رتع فالمذلة مثل ما يرتع الجامـوس — ولا يدري أن له رب نفسه يحاسبها

ولا نيب أبربه دام حضه كذا منحوس — ولأني وكيل الناس لو كثـر راسبها

ولا الله خلقني للبشر فوقهم فانوس — عسى الله يصلح عــــيبها مايخربها

أببعد بعيداًُ لا يقولون لي بلـوس — وأنا أهـل البلاسه عادتي ماتقربها

مادام العوايد والبشر حايستنا حوس — وبعضهم ركب وجناه ثم قام يشعبها

بليدً ضعيف العـرف مايفهم القاموس — ولأقاوم الـدنيا وخاض أبتجاربها

ضعيف العزايم ناقص المعرفة دنفوس — يبي طلعــت العليا لكن يتيهبها