((((( عـيــون الاخـبـــار )))))

ياكثر ماسافرت من دار لدار — ومليت دربي ماوصلت لنتصافه

بس أتمنى لو لحقت الخلافه من قبل تنهار — وقبل أتمدن فالعرب والصلافه

ومن قبل مايجتاح الاسلام التتار — ودم العرب تضماه تبغى لرتشافه

النكبه اللي ماحصل مثلها وصار — من بعدها بانت علينا الضعافه

اللي يبيها ينشد عيون الاخبار — من قبل سات وقبل عصر الصحافه

قضيتن من سمعها لازم يغار — حقيقتن ماهيب كذب وخرافه

وانا خلقت من العرب دمنا حار — فينا حرارت دم زايد لقافه

زودا على اللي مهدرا ماله اهدار — والله كفل رزقه بنونه وكافه

والبذخ والتبذير يعمي اللابصار — اعماه حتى الحق معاد شافه

وبعض ألثرى ياتي على صاحبه عار — وبينه وبين الخير بعد ومسافه

ماينفع المحتاج والصاحبه ضار — لاصاركثرالمال مع عقل سافه

قطعة حديده مالها وزن وعيار — نقص بعقل اللي شراها وسخافه

تبذير دون شعوروالوقت دوار — والمال عند الخبل يصبح حسافه

معاد للاحسان طاري ولا أذكار — عن يمته تسببوا بأنحرافه

كم من فقيرا مالقى ثوب ووزار — ولا له فراش ولا يحصل لحافه

ويلا تعشا مالقى لصبح افطار — ومن كان عنده مال مامعه رافه

وكم شايبن فقران وعياله اصغار — لكن ياقف له حياه وعفافه

وحبال عزمه لابغى ينهض اقصار — دايم وفقره دايرا له اكتافه

يبغي يمين وحضه يحده ايسار — وقام يتعثرواضعف الناس طافه

وزودا على اللي صار ياكثرلاشرار — في مجتمعنا خاف لاتصبح أفه

ثم ينجرف شبابنا خلف تيار — ويصيرسبة ضيعته وأنحرافه

الليل كله فالبلد دار مادار — كنهم من العمال واهل النظافه

والحق بين ما على وجهه غبار — كل بصم في صفحته باعترافه

ومن يعمل المعروف من ربه مجار — والباب مفتوح لمن معه ايضافه

مفتوح لرجال لهم قدروكبار — اللي يعسفون المشاكل عسافه

وانا عرفت رجال ذربين وخيار — ونهلت من نهرالادب والثقافه

وعايشت ناس مسلمينن وكفار — وسلكت دربن صعب فيه أنعطافه

وعرفت أميز بين كيلو وقنطار — وصرفتها ماحتجت راع الصرافه

وعاصرت جيل العولمه هي والاقمار — وعلمت انا اللي موجز العلم طافه

ولاغصت في عمق البحر جبت محار — متميزا عن ماسواه بالنظافه

ولا أصيد كون اللي تلاعب بالافكار — أحلا من رضاب النحل والكنافه

بنات فكري كسبها مثل الامهار — ماتقبل الا الكاس ولا الوصافه

نوادرا لاقلتها تلفت انضار — وشعرايشوق من يغني بقافه

في خافقي للغيد حطيت مضمار — مايدخل بمضمار قلبي عجافه

حرص عليها كن لي عندها ثار — فيني شعورا فيه زايد رهافه

وجنب اللي فيه شتله وتكرار — وافرحبها فرحت محب ابزفافه

لاصدتها غنيت عودا وقيثار — كني من اللي فوق جسر الرصافه

اما تجي تلهب لها كفوف سمار — والا زعلت وعفت منها عيافه

اطب داخل فيضت الشعر وأختار — اخذ من اثقاله وجنب أخفافه

كنت أتمنى وقت حسان الانصار — لا يازمان المنذله والترافه

والا بعد في وقت ابن برد بشار — يوم الادب نهرا تطارد اضفافه

الشاعر ايلا غلط ماقدم أعذار — وقدام ينظر مايناظر خلافه

ويكشف عن الغايات ويبين اسرار — له وقفه في المجتمع وانصرفه

ويبعد احزانآ على انفوس الاحرار — ويفضح قضايا المجتمع بكتشافه

يالله تسقي مملكتنا بالامطار — وتنزل هماليله عليها بكثافه

عسى مزونن تنثر من الغيث مدرار — غيثآ رعد مزنه يخيف ارتجافه

لين ايتحلا وجهها ورد وزهار — وتحير العين في الزهر وختلافه

ويصبح ثرا ريضانها ريح عطار — او مصنعآ للورد حزة قطافه

وتلعب بلابلها على غصون الاشجار — وترقص مع ريح الهواء حين لافه

ويالله تجير ابوي ومي من النار — يامن عباده ترتجيه و تخافه

وتحطلي عند الرجاجيل مقدار — وترفع مقامي من دروب الكسافه

وتجيرنا من كل غادر ومكار — يامكملآ حج العباد ابطوافه

وختامها صلوا على سيد الابرار — على نبي الله كريم الضيافه