هــرم مــقلوب

الشمس غابت من سنين — والبدر تاه

حتى النجوم — وقفت على باب السما

تاخد عــزاه — والارض حبلت م الحداد

والبحر خايف — م السواد ليسيل عليه

والجو نــازل من عينيه — بركان حــــمم

يضرب تحيه للعـــلم — ويدور يفرق فى العدم

ع المعدومين — * بقالناسنين

هرم مقلوب — تاريخ مغلوب على أمرُه

وأ ُمَه للسـقوط آيله — وخيــلة وهم كدابه

وغابـه والأسود دلاديل — فى ديل القرد بنتبت

لحد القيمه ما انكبت — ونخل العزه بيطاطى

يسيل الدم من تمرُه — ومجد بيبكى على عمره

عشان الحال صبح مقلوب — يادوب نسمع

ونجّمّع بواسطة التهليل — ما بين الليل

وبين الليل بنتكفى — ونتخفى فى جحر العار

وسِـيبنا الدار — يدور فينا على خندق

بنـتشد ق بإنـا أهـل — وداء الجهل فى الجته

وجوه العته عتينا — ياريت ترجع

حروب الرده تحيينا — ما كنا سبوع فى وادينا

بقينا فى الشقوق ساكنيين — * بقالنا سنين

مستسلمين — ومسلمين للانهيار

سواقى النار بتروينا — وحوالينا الوجع إعصار

رافعين شعارالصمت — ورايات الخنا

فى عنينا — بتموت السنه ورا السنه

واحنا فى قلب المحزنه — واقفين ثبات

بنولف المقامات — ونغرق فى الغُنا

ملعون ابوها العكننه — طول عمرنا متعذبين

* بقالنا سنين — قاعدين بنستنى النهار

والنهار صعبان عليه — كل ما يحول يفـَتـَح

السواد يقفل عينيه — الليل طويل ومالوش حدود

والفجرمش عارف يعود — والشمس واقفه فى إنتظار

الشرق يفتح للصباح — والصباح محتاج يشوفنا

با لكفاح متسلحين — * بقالنـاسـنين

ما بين مدفون — وبين مسجون

وبين لاجئ فى علم الغيب — كل طرفة عين نشيب

من تراكيب المرار — والدمارفارد قلوعه

والحصارمارد مخيف — لمـَّا يبقى الزيف قاضينا

والنفاق حارس علينا — السلام هيلف بينا

جوه بحرمن الآهات — والغريب

إن احنابرضه — فى الآهات متفرقين

* بقالنا سنين — فاتحين كتاب الذكريات

اللى فات نردم عليه — واللى جاى نكسيه شموخ

والتاريخ مليان كرامه — والندامه حالها باين

والكماين جوه فيتو — بس هُس خلاص فينيتو

بكره هيحطولنا كيتو — واللى مش طايق يطق

واللى مدايق يعبى — والطبول ع الراس تـدُق

كل عام والظلم طايح — والفضايح مستـتبه

والعزيمه يأس جـامح — والنـصايح نص لبه

واللى نادى واللى لبى — فى الحقيقه ميتين

*بقالنا سنين — بين القنابل والرصاص

عايشين بنحلم بالخلاص — نايمين بنحلم

حلم مش لاقى الدليل — تايه فى سوق المستحيل

واقف فى وسط العتمه — مستنى القرار

محتارمابين — مص الشفايف والعويل

شايف زهورالجيل بتفتل — من دموعها حبال غسيل

والشعوب بتشيل بلاها — لماَ صبح الويل ويلين

* بـقالناسنين — بنكتب ع الجبين العار

بنمشى بس بالمندار — وبوسنا الارض

لما الذل دهوسنا — وفى نفوسنا

الخصام حمضان — وأحضان المحبه شوك

وبين شا كك — وبين مشكوك

ديوك والقهر كابسنا — ولمـَّأ الجهل جرّسنا

كنسنا كل مساجدنا — وشلشلنا وعدِدِنا

وذودنا المبله طيـن — * بقالنا سنين

وعين العقل مش فينا — ومش شايفين خطاوينا

وحطينا — ما بينا سدود

وشمتنا الوجود فينا — حفينا والصـدا كلنا

ودوخنا كتيرفى مشاكلنا — ولماالنفط فـشكـلنا

فـشلنا قـام وشنكـلنا — وشكلنا الهلا ك طوابير

وبين خنزير — وبين جنزير

زفير الشر بيشوطنا — ولماَ الحقد شلفطنا

خبطنا دماغنا فى القوانين — * بقالنا سنين

حوار البؤس متواصل — وبين الفصلهَ والفاصل

مفاصل شملنا سابت — وخابت صرخة الثوره

عشان العوره معووره — وجوه الصوره محروقين

*بقالنا سنين — بنشرب م العدم

ترعه ورا ترعه — ونشقا والعرق يطرح

ويفتح للرخا ابواب — وياما فى الجراب يابخت

فسخت العقد — والأجرهَ

مهاجرهَ لِعِب أسيادنا — وذوادنا ماهوش لينا

وحوالينا الألم موال — فى كل مجال بيشجينا

لا شمينا عـبير الخير — ولا اللـقطه بتـلقطنا

ولمـَّا الفقر سيـطنا — نحتنا م الخجل تمثال

مابين العجزوالأهمال — بنتـنطط

وبنشقط لبعض العيب — بقينا فى الحياه كراكيب

لا لينا شنه ولا رنه — وحنهَ اليأس مبادئنا

ودَيقـناَ السمع والشوف — ووشوشناالكسوف يخرس

لنتجرس من الإتيكيت — وبيت الرعب يطلبنا

وسَيِـبنـَّا الحرام يدخل — من الشباك والمسقط

ويتـشعبط فى نزواته — وذاته بتهدم الأوطان

ميزان العقل ليه اختل ؟ — وليه الذل غـرقنا

حرقـنا راية الأمه — وخلينا الوجع وجعين ؟؟

الإسماعيليه8/9/2006