يالله يا فكـّاك حبل المنـــــــــاشيب

يالله يا فكـّاك حبل المنـــــــــاشيب — تدعي طريق الخير مفتوح بــــــابه

يا عالم الحالات والسد والغيـــــب — ياللى على خلقه مضفـّي حجـــابه

طالبك يا ربي وطالبك ما يخيــب — عني ثقيل الذنب تمحي كتـــــــــــابه

تبري عليّ من الوزا والتعذيــــب — ومن كل جحيم ٍ سنوها بالتهـــابه

نهار كود الناس عند الحساسيب — من يوم ما كل ٍ يأدي حســــــــــابه

قل له : على نرجيه فوق السلاهيب — مدّ السلايع نـــــــــاقلات الحرابه

يبغن عقيدٍ والي الشور حرّيـــــــب — صقر ٍ مجرب ما تعيي ركــــــابه

واحذرك من بيته ضعيف التراتيــب — يمحنك في الشطـّات عند الضرابه

هذاك ماله في الجميله مطاليــــب — لا جاد في شيبه ولا في شبـــــــابه

تلقاه من خس الأمور الدباديـــــب — لى نافخ ٍ جوفه ومازر إيهــــــــابه

نقرى علوم السر في قلوبنا غيـب — وكم ٍ غريــــب ٍ سدنـّا ما درى به

العز مسناد ٍ دروبه متاعيــــــــــب — أدنى العرب لو من تمنــــاه جابه

ما برح إلا غافها والمحاضيـــــب — في جارح الوادي وباقـــي ترابه

ومن سار عن داره ترى ذاك هوب عيب — العيب من يسكن ودسـّوا رقابه

تمّت خلا ديرانها من المعازيـــــب — تمـّت تبابه وانتهت لــــــي عدابه

وقفيت من داري بكود ٍ وتغصيــب — مقفي ولا لي متلويـّه عقـــــــابه

ساير أدور غار ولقيت لي ذيـب — وبنيت بيتي تحت عش العقــــــــابه

عن المذله والربع والمهازيــــــــب — جينا إلى ديرة صقور المهـــــابه

لى حاميين ديارهم بالتغصّيـــــب — وبزرق عيـــــــــدان ٍ تعوّي حرابه

نعيم خضران السيوف المحاديـــب — أهل الوفا والسمت وأهل الصلابه

لى صفــّهم من حوز بلد اليعاقيــب — الى الشارقه منقــاد سور ٍ حجابه

أهل المعزّه والحصون المناصيــب — قبـّاضة ٍ للسيف قــــــــايم نصابه

وحصونهم هجن ٍ طوال الأغاريـــب — وكم من صبي ٍ حرمنـّه شبــــابه

عسى وطنهم من هميل السحاحيب — يلين كل وادي تفيـّض شعــــــابه

والعشب يزخر في سيوح وعراقيب — بجاه من نرجو عطـــــــاه وثوابه