عبرتك فعل البليد ومكسبه وإفلاسه

عبرتك فعل البليد ومكسبه وافلاسه — من يدور طب عينه والحصيل اعماها

ادري ان العلم نور وفي يدي مقباسه — من قبس نور التجارب والزمان اهداها

منصب الي بالجماله سلموه ارياسه — منزله عند القلوب الطيبات اعلاها

ورفعة الي بالتواضع يستحق ادراسه — تعتلي هام السحاب وينتثر لك ماها

مايبي له بالملامح معرفه وافراسه — لاصخر لك قلبه الله ضيقتك يجلاها

انتج ابمر الليالي والهموم اسياسه — من قبل نبت العوارض قد عرف مسراها

وقد شرب جور الظليمه واحتضر من كاسه — والنكوفه باليالي في نعيم ارضاها

كنه بسجن المصايب والبشر حراسه — ينتخي لين الضماير بالنفوس ابلاها

للفرج هم الليالي لو يطول ارماسه — طبّه الصبر الجميل وعلّته داواها

من فتح كنز القناعه يكتفي بألماسه — ملتزم حفض الوصيه واللذي وصاها

والطريق الي مشيته يفهمه من داسه — واللبيب الي تعبّر مايشوف وزاها

من تطيب باليالي تستطيب اغراسه — غرسة الطيب رضا الله بالمزون اسقاها

والنفيس امن المعادن مايصير انحاسه — من صفاته بالمفارق زينته يزهاها

والبشر كلاً يطبل بالسعه مرواسه — وإن عوى ذيب الشدايد ماتجر اعواها

لوسند ذيب الشدايد بالشديد ابساسه — من رداة الي تردى نخوته ذكاها

إنتبه من سطوت الي يبتدي وسواسه — ميّسك لاحصلت بك علّته مفلاها

والزمان المر خاوا بالزمان انجاسه — وافسد الله من فساد المفسدين إرداها

مايموت الحاسد إلا من سبب هوجاسه — يحسب إن نفسه بريّه والحصيل أفناها

والحذر من خوّة الي يبتليك ابلاسه — من نكس دون المراقي عيفك مرقاها!!

مايشيل الخافق الي تحتويه اقواسه — في صدارة همه إلا طيبتي واجراها

من نطق بالحق يكفي لانطق عبّاسه — فيصل الي يوم نادت حكمته لبّاها

صاحب الخطبه خطيب وخطبته من راسه — في ميادين القوافي خطبته رسّاها

جيت والمعنى عليّ إن ما حطب لي فاسه — وأثبت الجزله على الي يسمعه وابداها

لاأحرق الي مايغطي باللزوم إلباسه — .وأترك إحروب القصايد من يدي وانساها

مير أنا للحر فرخ ومرجعي من ساسه — يومه أشبعني طناخه والعروق ارواها

حر فرخ لحر ضاري بالوفا قرناسه — .سبّح الله من يعاين هدته واثناها

دونه العقبان تبطي ماتقيس اقياسه — ما أرهبنّه في جثثها من سطى ينصاها

وافق المفهوم واسقى بالمنيّه كاسه — والكبود الي تعصر السم سم اسقاها

مرحبا بالي لفونا قلتها بكياسه — من بني عم وخوالي والغلا مركاها

واصدقانا من وفانا مالها مسّاسه — تسكن اعيون الكرامه بالوفا نرعاها

وارتكي للخايب الي عسعس ابعساسه — لاتردت نفسه اللي بالردى عشّاها

ثالث الثنتين هيّب من يدن اجراسه — لا حصرته بالمهابه نيته صفاها

يعرف اني له سعوط وفي لقاي اعطاسه — نفسه الله في وجودي حدّها لأقصاها

ولو وجودي مايعدّل للعوج مجلاسه — وأسكته ماجيت جده والبحر يزهاها