حزن النبلاء

الجرح ماهـو خاطـر شـوي ويـروق — الجـرح حتـى لـو تشافـى يعلّـلـك

واذاك متحمـس متـاهـات وطــروق — أنـا تعبـت أشـد حيـلـي وأحـاولـك

سماي ماشي شمس ورعـود وبـروق — والريـح ماهبّـت ولا يجـري الفـلـك

والقلب ناشف بحر .. وشقوقـه شقـوق — وشلـون بيكـوّد سـحـاب ويبلّـلـك

ياظامي أنا أظمـا .. ومتشبـع حـروق — واذاك ظامـي للمواصـل أنــا هـلـك

هلك .. ووقف في وجهي الأصل والذوق — والمجتمـع والعـرف والفقـر وأهلـك

متعومس .. وحـزن النبـلاء مرمـوق — يعني لو أحتـاج لـك ماجيـت أسألـك

اللي علي أشكـي .. وأعاتبـك برفـوق — وأقـولـك ودي مـاعـاد أتـأمـلـك

مـن دورة الأيـام ياخـوك مخـنـوق — الوقـت مشانـي مـن السلـك للسلـك

أزل خطـوه بـس مـا أزل منـطـوق — ولو صارت أبا أحب خشمـك وأجاملـك

يبقـى البنـي آدم مـجـرد ومخـلـوق — ملك .. ولكن فـي الحقيقـه بـلا ملـك

والناس عوق الناس .. والدرب مسبـوق — تتعب على أشيا ف الآخر ماهـي بألـك

كـذاب قايـل : كـل مطـرود ملحـوق — سنين وأنا أطردك وأزريـت لا أوصلـك

كنّـك تطيـش وكنـي أدور فـي طـوق — كل ماوصلت آخـرك يطلـع لـي أولـك

ياليت ما في خاطـري شـوق وفـروق — ما كان حسيت ان أنا بـس منـك الـك

الشوق ماهو رعشـه وقبضـة عـروق — وماهو اللي من شينك ف عينك يجمّلـك

وماهو شعور يخالـج الـروح برفـوق — ولا هو سحر ولا أدري والله شاقول الـك

كنّه سحابـة حلـم وتطيـر بـك فـوق — وتطـيـر .. ولا ودّك انـهـا تنـزلـك

الشوق هذا .. والا أنـا شوقـي البـوق — ماقد حصل في شـوق هـذي ولا تلـك

تدري وش أسوّي الى أضنانـي الشـوق — أسـوي بعيـونـي كــذا وأتخيّـلـك

وأقربّك واتـوق .. واتـوق .. واتـوق — وأكثّـرك وأحلـف مـا عـاد أقلّـلـك

وأصوّرك في الموق .. وتكبر على الموق — وتطيح مع دمعي علـى ايـدي وأقبّلـك

هذا غـلاي اللـي مـع الـدم مدقـوق — ولا عاد تسأل عـن شعـوري بزعّلـك

محبـة ماهيـب مـن طـارف السـوق — لو انـك توكـل .. كـان والله لا آكلـك

جيتك حقوق ورحـت ماعنـدي حقـوق — وان قلت مـا أحبـك أبجحـد مواصلـك

أحبـك ؟ ألا يابـري حالـي وعــوق — من كثـر ماحبـك أخـاف انـي أقتلـك