بياع كلام

اضغط على أي بيت لعرض معانيه وشرحه

بياع كلامامى كانت ديما تقولى بياع كلام...

بياع كلام من يومك ولا حد سائل فيك....ما امك قالتها زمان ...

لو الكلام بفلوس ...الشعر كان يغنيك.....ورق القصايد داب وكمكمة غنويك....

اصرخ وقول يا بلد وادن أدان الديك....قول يا بلدى يا طيبه يا ام الصبا والشيب...

يا ام المقام عالي طبعك معايا عجيب...عطشان يا غيط الطين ومكسره سواقيك....

ومشققه ارضك... ولا زرع نافع فيك....انده بصوت عالى شوف مين هيسأل فيك....

عشمان تصحى الناس؟كانو اولى سمعو الديك...رغم أنه بيبشر بمعاد طلوع الصبح....

ماشفعلهوش عندهم وما انقذوش م الدبح...سابو الكلاب فى امان علشان كلامهم نبح...

عايز تعيش ف امان مارس سياسية المدح....وانضم لل الصعاليك....

كل اللى حاول نجح ليه عندنا ما نجحش....شجر الجناين طرح شجرنا ليه ما طرحش....

كل الامور اتغيرت والغرب أصبح وحش...اكل الحصاد.. سرق البلاد.. بدل أدبنا فُحش....

حتى ال كان فاضل لنا جزره... قطمها الجحش....وجثة متخشبه.. رافضه تخش النعش...

فى دهشه مستغربه ليه حقها ما رجعش؟؟...ودمعتين في عنيك...

رموك فى بحر غريق ومكتفين رجليك...بايت بتكتب شعر والصبح تتسول!!...

كام حد يسمع ويفهم فتقول من الاول!!..فاكر لشعرك سعر؟ من غير ما تتحول !!...

الشعر بين أربع حيطان بيتخلق ثوره...ويا دوب يشوف النور يتقلب عوره...

ف تجرى تدارا من فكره غضبانه.تخاف ينسبوها ليك ...بتخون بنات قلمك...

ونكرت افكارك..يالى الكلام كارك...طب كان من الاول...

اقله كنت تنول بركة رضا المماليك....بياع كلام ..من يومك.. تتمنى وضع الكلاب...

و تخاف مصير الديك....

عن القصيدة

«بياع كلام» من شعر أبي حجاج، وتقع في ٢٠ بيتًا. وهي بالعامية، ورويّها حرف الكاف.

التعليقات(٠)

سجّل الدخول لإضافة تعليق.