المملكة عندنا غير

يا طير غرد , وازهري يا نواوير — يا شمس طلي , وانزحي ياغمامة

ويا نفس زفي للوجيه التباشير — ويا جفن كف من البكا والندامة

من هالدقيقة ما للاحزان تبرير — برجوع أبو خالد لنا بالسلامة

ما دام (سلطان) الكرم حي وبخير — ما عاد ننشد .. لو تقوم القيامة

بشت يذرّي عن عجاج المعاصير — ووجه يرد ارواحنا بابتسامة

وكف يجود بلا حدود ومعايير — وشهامة ما بعدها من شهامة

أكرم من اللي ما ياخذ الجود تبذير — واصدق من عتاب الخوي في خصامه

واشد من ضرب السيوف الشواطير — واجلّ من وصف يحدد مقامه

(سلطان) ياقرم يقود الطوابير — يا سيد الجيش السعودي وإمامه

يا شوق تلعات الرقاب الغنادير — يامنبر الدين الحنيف وحسامه

جيتك وفي صدري وطن من تعابير — وبخافقي حب الكويت وغرامه

لان الرفيق: يحن, ويحس, ويغير — والصف الاوحد .. مستحيل انقسامه

شعب الكويت يكن لك كل تقدير — ويبّلغ الشعب السعودي سلامه

ويعاهدك مهما تدور المقادير — نبقى لكم مثل الفشق في حزامه

لأن قد المملكة عندنا غير — المحترم يفرض عليك احترامه

واللي يوفي بالتزامه مع الغير — عيب علينا ما نحفظ التزامه

يا جارنا اللي ما يجي منه تقصير — يا أكبر دروع اهل الجزيرة ضخامة

أرض الحرم.مهد الكرم.منبع الخير — طهر الظبي. ستر العبي واللثامة

يا قصة الكوثر, ويا زمزم البير — ويا موقع أقدام الخليل ومقامه

أغلى ثرى تاطا به الرجل وتسير — واكثر عباد الله ورع واستقامة

إن كبّروا هزّ الفضا صوت تكبير — ولسجودهم في ناصيتهم علامة

طول اللحى لوقارهم زود توقير — وقصر الثياب ابهم .. جمال ووسامة

أصحاب نهج ودينهم دين تذكير — وآمالهم تبني وطن من عدامه

لان العمل يجمع شعوب وجماهير — عمر الجهل ما عز للدين قامة

ومن يدّعي الاصلاح لأغراض تدمير — ما اظن للرحمة صلة باهتمامه

الموعظة تيسير .. ما هي بتعزير — وحنّا نميّز بالحلال وحرامه

ما للهدف من قتل الاطفال تفسير — وصبر على فعل الجرايم .. غشامة

أكثر من اللي صار.. وش عاد بيصير؟ — المسألة وصلت حدود الكرامة

ما الله خلق في سمانا عصافير — والحمد لله ما لنا بالرخامة

جهّالنا عند المواجه مغاوير — وافعالنا عزم . وثبات. وجزامة

يوم الضعيف في الشدايد.. معيثير — حنا ليا ضاقت.. نطشّ العمامة

نفزع بوجه المدفع بسيف وبعير — ولا عاش فينا من يرد بكلامه

يا مير ما يلحقكم الشك يامير — ولا غيركم يا اهل الزعامة زعامة

الله مدّبر فيكم العدل تدبير — ومعكم يسود امن البلاد ونظامه

وان كان للفتنة على الشعب تأثير — يمكن تزّود وحدته والتحامه

الحكم حكم الله , ولا فيه تغير — ودوامكم يا سيدي من دوامه

والله لاعنتر.. ولا سالم الزير — يقدر يزعزع بأرض الاسلام هامه

دام الفهد طيّب ، وأبو متعب بخير — والنايب الثاني رجع بالسلامة

هلّت على الشعب السعودي تباشير — وقامت على حزب الضلال القيامة