المشهد الأخير ..!!

البارحه ليـت لـي عنهـا مـلاذ ومجيـر — النور منهـك وساطـي فالعيـون الظـلام

والصبح ماهو قريب ولا بقـى فـي جفيـر — عيني من السْهِر لا طلقـه ولا مـن حـزام

يا سيد البـال مـات مـن الكـلام الكثيـر — مابين شرهه ..حياء .. تقدير ناس ..وحرام

لين إمتلى الخرج صمت وجاء يحث المسير — البوح ..وآنا أتصـدّد عنـه ليـن إستقـام

قدّامـي وكـان لا بـد الرحـى تستـديـر — وإن طاح حب العتب فـ/ إقرى عليه السلام

وإن قلت صدرك كبير أقول سرّك فـ/ بيـر — يردون يمّه عطش.. يقفـون منّـه صيـام

لا يشغلك هرطقات البعض.. يـوم النفيـر — يبين حكي الفضا لا أشتـد وقـع الحسـام

لو عذربوا نزفك إنّه من عروقـي غزيـر — ما عابك إنـك عظيـم تمـد مـدّة عظـام

يغرون بك نقص أنفسهـم ولا فيـه ضيـر — مادامهـم يعرفونـك حـر مالـك عـمـام

إقلط علي مالـك بقلبـي شريـك وخشيـر — مبطي وأنا أمـر ساحتهـم مـرور الكـرام

ياحادي الشعر مبطي من غـلاك أستخيـر — واليوم ذودك على فكـري تسوقـه حيـام

تجي ..تحث الخطى يمّي ووضعـي خطيـر — وتوقظ لـي الذكريـات وتستثيـر الغـرام

تجي ..وتفتـح شبابيـك الغيـاب وتثيـر — وجدي على بيت طين وعاشقيـن وحمـام

وأروح أرواد عصّي الدمـع حتـى يحيـر — في مدمعي لين ينبـت فـي عيونـي مـلام

للحاره الشاهـده حـزن الفـراق الأخيـر — وشلون تقدر عقب (مي) الشـوارع تنـام

وشلون تقـدر تلـمّ الأرض قطعـة حريـر — بالله وشلون ما تبكـي عيـون الغمـام !!

لا شاعرك مستريح من السفـر والهجيـر — ولا أنت تقدر تعود وما بقـى بـي حطـام

ويراودوني على الذكـرى وحلـم الفقيـر — وأهرب بقلبي عن عيون البشـر والزحـام

لو أملك الريش كان أنفض جناحي وأطيـر — وأروح أخـاوي بجنحانـي طيـور اليمـام

تعبت واللي خذاك آقـول طيّـب .. بخيـر — وأتعبني الشعر يـوم أبعـث رميـم الكـلام

وأنفخ به الروح وأكسيه الشعـور ويصيـر — بإحساسهم همّ ليـت الحـرف أخـر مقـام

للحزن ..ماكان صرت لـ/ هالمواجع خفير — أرقب لـه الخاليـات الموحشـات السقـام

ولا غزتنـي تجاعيـدي وتـوّي صغـيـر — وما كان للصدر من غبن السنيـن إحتـدام

لو ما العزاء إني بوجه الوقت خصمٍ كبيـر — وإني على كثـر طعناتـه كسبـت إحتـرام

الناس .. ما كان يلفـح وجنتـي زمهريـر — برده ولا أنخى دفا ربعـي ولوهـم حشـام

والحين ياحادي إحساسي وجيشـك مغيـر — يمّي عسى طاب خاطرك وعرفـت المـرام

ياحادي الشعر منك ومن عنـاك أستجيـر — أطلق وثاقي تعبـت مـن السهـر والهيـام

ياطول ليلك وأنـا مـا باقـيٍ فـي جفيـر — عيني من السْهِر لا طلقـه ولا مـن حـزام