احترتُ بالحاير

احتـرت بالحايـر بكثـر التفاكـيـر — صبري قضا ماعـاد عنـدي عزايـم

ان جيت ابا أجلس وان كنت ابا سير — فكري أتعبني وانـا اتعبـت القوايـم

عدي كسير طاح فـي قاعـت البيـر — أقـرش مقامـه والرشـا والردايـم

ولاسباح ماعـرف جيهـت السيـر — دش البحـر باليـل والمـوج عايـم

بغـى النجـاه وضيعتـه المعاصيـر — فقد حياتـه عقـب كسـب الغنايـم

ولا مريـض ماعرفـوه الدكاتـيـر — قالو طريـح فـراش ماهـو بقايـم

باشاعـة ليزرماتبـيـن التقـاريـر — لـو عالجـوه علاجهـم مايـلايـم

ولا سجينـآ حـط دونـه نواطـيـر — صـدر قـراره فـي عـدة جرايـم

على اللذي من حبهم كيف ابا صيـر — القلب غـاديً مـن سببهـم قسايـم

خلى بعيد من ورى هديـب وصويـر — بضهيرة الصقـار غـرب الخرايـم

يامـا حـلا نطـت تليـل الصقاقيـر — حزة غروب الشمس والجـو غايـم

وطرقت شوفي مـع ذيـك الحثابيـر — واشـوف بيـوت مشيـده بالعدايـم

وشفته قدام البيت عنـد المصاغيـر — متخصـرآ بيـن الجلـد والفطـايـم

ومشجرآ ثوبه مـن الـورد تشجيـر — يشكنه اللـي مثـل بيـض الحمايـم

طيفه تصور لي اذا نمـت تصويـر — دايـم يهرجلـي اذا كـنـت نـايـم

ياشـب قلبـي شبـة النـار بالكيـر — نـارآ تلضـى يابسـات الهشـايـم

مافيـه يـوم مـر ماهنـي الطـيـر — اللى علـى روض المحبيـن حايـم

هـذي ضـروف ايامنـا والمقاديـر — هـم ٍ وغـم ٍ فـوق راسـي تلايـم

باليـل انــا والقـلـم والتعابـيـر — سهـران حتـى كوهفـن النعـايـم

صبرت حالى عن هوى النفس تصبير — ولا اطيع انا في حبهـن كـل لايـم

نبغى وصوله لـو لحقنـا مخاسيـر — قلبي على قرب اريش العيـن هايـم

الكبد ياسليمان عيـت عـن الميـر — كنـه بشـوب بحايمـات السمـايـم

ياسمرها سمر الخشـب بالمساميـر — ياحشـه حشـت حشيـش القصايـم

افـزع لنـا بشورًوفكـرآ وتدبـيـر — يفـداك عفنـآ ضـاريـآ للنمـايـم

حيثك فهيم ومن رجـال بهـم خيـر — ولا الردي عن هرجته تقـل صايـم

نعمين وان قالولكـم عـزوة مطيـر — عساك تبقـى يابـن الاجـواد دايـم

وصلاة ربـي عـد خـط الاساطيـر — علـى النبـي اعـداد ماهـل غايـم