مني لسيد الزجاله

منِّي لسيدْ الزجاله — ألفينْ سلامْ فوقْهم بوسهْ

ما لوشْ نظير في الرجالهِ — يخلقْ من الهبيك دوسهْ

زجالْ جلالتنا المحبوبْ — حاملْ لوا جُند الشّعرا

حايزْ نشانْ رعرعْ أيوب — ومعاه لقب جاب اليسرا

في كلِ عامٍ يبعتْ مكتوب — نكاتْ عاملْها بالعاني

يعجب على المالِ المسلوب — أزاي ما يرجعْ بالتاني

يا عم أنا مالي مسُوجر — مال الصبا ماليش غيرُه

ما فيهش خمسهْ من البوكرِ — ولا جديدْ جام الزيرُه

قارِي عليه العدِّيَّه — ومحصَّنُه بالطشطوشي

تروحْ وتيجي النقديه — واللطخ يطلع بلّوشي

يتعب ويشقى ويتشحطط — ويظن إنه صادْ صيدَه

ويفوق يلاقيه اترّبط — ولا ينوبُه إلاّ الكيده

وبتشتري في القولِ وتبيعْ — يا ما أنت شاطرْ في التأليس

وإنت يومْ قاضي توزيع — وأربعْ شهور مأمورْ تفليس

مكتوب على جبينكِ يَفْطَهْ — فيها النظافة من الإيمانِ

وإن جاك حرامي في طنطا — يطْلع من السرْحه ندمانِ

على عزومْتين في الفسحهْ — تعمل زجلْ يطلع وشّين

والبطن اتابي لها قرحه — تقعدْ مع العاقلْ شهرين

عزومةِ الشيخ ما تقولشي — فيها الديوك كانت تدّن

لو طُلت لك شَفطةْ طرشي — لقلت دي الأشيا معدن

فتة ملوخية بفرّوج — تاكلْ صوابْعك وياها

والشرب م الماء المثلوج — أكله حلال ما أحْلاها

وأكلة الريّس دي تفوق — على الجميعِ عقبال عندك

وإن كنتَ عايز مره تدوق — قدِّم طلب إذا كان بدك

يا ما عزومات رديتها — وقبلتْ بس الاتنين دول

فروض عليَّ أديتها — إكمنَّها م الحُول للحول

ما فيش نفر واحد يطلع — يقول أكلْ عندك مرّهْ

كانون سيادتكم زرع — والثلج فوقهُ للسرهْ

إن كان حِداك حد قصيّر — تبعت له واحدْ يشتالُه

ويقول له عيط يا صغيرْ — ويحمله بحالُه ومالهْ

غالي طلبْ حاجة رخيصه — والخيْر حدانا يتْواجد

عندي فلاتيه جعيصه — بالزوفه والسعر مهاود

إياك يجي لك يا صدقي — في الشقلبة الجايه قرشين

ويسكّنوك في باب شرقي — إن لم يكون بين النهدين

السعد طاحونْ في شارعِ — واللي مقدّر له يقْلب

ربك كريم فضله واسع — وبردُه تدبيرُه يغْلب

أعذر صديقك في التأخيرْ — لأن حالُه كان واقف

وبا وسخره وشغلْ كتير — الله يساعدكَ يا ناصف